នាព្រឹកថ្ងៃសុក្រ ៤កើត ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែកុម្ភៈ ឆ្នាំ២០២៦ គណៈប្រតិភូគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃព្រឹទ្ធសភា (គណៈកម្មការទី៩) ដឹកនាំដោយឯកឧត្តម អ៊ុ សារឹទ្ធ ប្រធានគណៈកម្មការ បានអញ្ជើញទស្សនកិច្ចនៅក្រុមហ៊ុន VP.Start Technology Co., Ltd ដឹកនាំដោយលោក ភឿន ផល្លី នាយកប្រតិបត្តិនៃក្រុមហ៊ុន VP.Start ស្ថិតនៅសង្កាត់បឹងកក់២ ខណ្ឌទួលគោក រាជធានីភ្នំពេញ។

ទស្សនកិច្ចនេះ ក្នុងគោលបំណងដើម្បីឈ្វេងយល់ពីនវានុវត្តន៍ គំនិតច្នៃប្រឌិត និងបច្ចេកវិទ្យាវៃឆ្លាត ដែលសិក្សាស្រាវជ្រាវបង្កើតឡើងដោយវិស្វករកូនខ្មែរក្នុងស្រុក។
VP.Start ជាក្រុមហ៊ុនបច្ចេកវិទ្យាមួយដែលផ្តោតសំខាន់លើនវានុវត្តន៍ បានបង្កើតដំណោះស្រាយទៅលើការគ្រប់គ្រងបណ្តាញចែកចាយថាមពលអគ្គិសនីបែបថ្មី ដែលជួយឱ្យការគ្រប់គ្រងអគ្គិសនីទូទាំងប្រទេសមានស្ថិរភាព និងមានប្រសិទ្ធភាពខ្ពស់។ ក្រៅពីនេះ ក្រុមហ៊ុនក៏មានបច្ចេកវិទ្យាសម្រាប់ទីក្រុងវៃឆ្លាត បច្ចេកវិទ្យាសម្រាប់គេហដ្ឋានវៃឆ្លាត ប្រព័ន្ធទំនាក់ទំនងសកល AlienCheck និង Cloud Computing ផងដែរ៕

ប្រភព៖ នាយកដ្ឋានព័ត៌មាន